(الزايـدي والتغلبـي) شلعان بن ظافر الودعاني

لشاعر الدواسر الفحل المرحوم شلعان بن ظافر بن فهيد الودعاني

طار الكرى من مقلة العين وأمطرت=سحابة يسبـق مطرهـا رعودهـا
في صافي القرطاس يمشي بها القلم=مثايـلٍ خيـط البريسـم يقودهـا
ناخـذ نواديهـا ونتـرك هزيلهـا=فعل الردا ما خـش بيـن بنودهـا
ذا شرعنـا وطبوعنـا وسلومنـا=نسبق على العليا ونرقى سنودهـا
وان جت سوالفنا ينومـس دليلهـا=صحايف التاريخ تثبـت وجودهـا
سوالـفٍ مهيـب لاحـدٍ غيـرنـا=جيراننا وجدارنـا مـن شهودهـا
حنا الدواسـر ممنـة كـل خايـف=دايم على العليا تواثـب جهودهـا
الطيب ما يخفى علـى كـل طيـب=الآجواد كسب الطايلة مـا يكودهـا
الزايـدي والتغلبـي مـن دوسـر=أفعالهـم عـود بعيـن حسودهـا
بالسيف نملك كل خضـرا مدينـه=لين أصبحت جنة نهـزع فنودهـا
حنا هل الوادي عمـا كـل عـادي=لا جت شيوخ القوم تسحب جرودها
نحدهـم ونردهـم عـن هـواهـم=والموت للي جـا بقومـه يذودهـا
هـذي ديرْنـا والآذانـي تسمـع=واللي يسد اذنيـه منهـا جودهـا
حنـا بنـي زايـد بـزود فعولنـا=والزايديـة كـل يـومٍ بـزودهـا
نفعـل بفعـل جدودنـا ونزيدهـا=حيث الضرايـب تتبـع مهدودهـا
حنا هل البل مـن قديـم وحاضـر=فنس الخشوم اللي زيـانٍ خدودهـا
تفرح بنا لا صـاح صيـاح ريبـة=لا حنت الفاطـر تبـي مفرودهـا
نلحق على قـبٍ سكنـا ظهورهـا=كن السهـوم المطلقـات جسودهـا
ولا من رمـت بقناعهـا الزايديـه=وعلى جثيل المال ساقـت قعودهـا
نـورد الاسيـاف بيـضٍ لوامـع=ونصدر الاسيـاف حمـرٍ حدودهـا
خيالـة الحرشـا ونعتـزي بـهـا=عـزوة حـرارٍ مرثتهـا جدودهـا
وخيالـة الجدعـا وهـي عزوتنـا=ولانفخت بعـض الرجـال لغودهـا
وراعي صخاف الشول سيفٍ قاطع=لامن انتخى صاب الخيول جمودهـا
نرعى بها غصبٍ على كل حاسـد=يبـرى لهـا خيالهـا نمـرودهـا
وفرسانها من دونها تنطـح العـدا=باللي تقص الراس مـن جلمودهـا
حنا هـل القيمـه رجـال الشيمـة=دواسـرٍ كسـب الثنـا مقصودهـا
الزايـدي والتغلبـي مـن دوسـر=تاج الفخر ملبوسها من صمودهـا
نحـب نكسـب كـل علـمٍ طيـب=سوالفٍ يازيـن قطـف ورودهـا
اهل الحسب واهل النسب والشيمة=نعطي الرجال حقوقهـا ونزودهـا
هـذا كـلام الشاعـر الودعانـي=مثـايـلٍ بافعالـهـا وشهـودهـا
ماكل من يرمي الهدف صاب الهدف=ولا كل شجرة ينبت الورد عودهـا
تمت وصلى الله على سيد البشـر=ما غنـت الورقـا بعالـي فنودهـا

رحمك الله ياشلعان بن ظافر الودعاني واسكنك فسيح جناته

صح لسان الشاعر .
ولاهنت يابوعبدالعزيز على مجهودك الرائع .
ولك تحيااااااااااااااااااااتي

	حنا الدواسر ممنة كل خـايف دايم على العليا تواثب جهودهـا الطيب مايخفى على كل طيب الأجواد كسب الطايله ما يكودها رائع دائماً رائع يعطيك الله ألف عافية يالغالي

يعطيك الله ألف عافية يا ابو عبد العزيز ارجو تثبيتها

الله يرحمة شاعر فقيدة لدواسر ومشكور يابوعبدالعزيز ...

ابو عزوز

بيض الله وجهك

ولا هنت يا أبن العم





سلامي لك

رحم الله ابو ظافر اللي قال قولت الحق
ماهوب خربطي مثل شعار ذالوقت اللي حطوا قابوس دوسري والغريري دوسري