التسجيل

  اعلانات المنتدي

 

 

 

 

 

 

 

 

   
إعلانات المتندى
اعلان هل للدواسر امارة شمل دور الدواسر في بناء الوطن ابن عبار الأمير ماجد الحبيبي و قصص من حياته اعلان
تغطية الأمسية الشعرية برعاية ساحات الدواسر الجميلات
العلامه ابن عيسوب في كتاب جديد كلنا خالد


مركز تحميل ساحات الدواسر

ساحات الدواسر
العودة   ساحات الدواسر > الساحات التاريخية والأنساب والرأي > ساحة النقد والتصويب والوثائق المصورة

رد
 
أدوات الموضوع إبحث في الموضوع طرق مشاهدة الموضوع
مشاركة بواسطة:
قديم 01-26-2011, 07:10 AM   #1
عضو جديد





ابن جفران غير متواجد حالياً

اخر مواضيعي


افتراضي كـــــــون ضبع بين سبيع وبن قويد والدواسر

السلام عليكم ورحمة الله وبركاته
اللهم صل على محمد وعلى آله وصحبه أجمعين

هذي سالفة كون ضبع حصلت بين سبيع العارض وبين ابن قويد ومن معه من الدواسر
حدرو سبيع العارض واانقسمو على راس علي بن جفران من العزه (المجدع)قسم منهم حالو يم الصمان وقسم قعدو في العارض وسبيع نصهم حاضره ونصهم باديه الحضر اجلدو والبدو
حدرو جاك بن هادي وحول مع العتش وسبيع بغو يربعون في العتش يوم شافو بن هادي جنبوه مع العرمه والى بن قويد ناطحهم من عند القنينه من تحت الرمحيه يوم نطحهم معدي بن قويد
الدوسري قالو انا نبي نستامن من ابن قويد لايكين علينا كوده انه يعطينا الصلح ونرتع ونكافح قحطان لاياخذونا راحو لابن قويد يستامنون منه يوم شافهم قال بن قويد لربعه هذا علي المجدع
جانا يبينا نمنه عربانه كلها حادره ولامعه الا شرذمة عرب ويبينا نمنه لكن انت ياقبيبان انت وتسعة الخياله اللي معك لوذو عن العهد لاتحضرون العهد حتاكم تاخذون ابله يوم عاهدهم وامنهم
قال انا امنتكم مير ترى قبيبان مااقول عليه قالو انت امنتنا قبيبان ماعلينا منه راحو من عنده وقبيبان ماحضر العهد صادّ عنهم ويلقف لهم قبيبان هو والخيالة التسعه اللي معه وغارو على الابل
وياخذون ابل ابن عبار عجمي قصير للسبعان ويلحقهم علي المجدع والالخياله اللي معه ثلاثه معودين من بن قويد ويصفقون عليهم واطردوهم لين اظهروهم من الابل قبيبان حذف الرمح
على المجدّع وطعنه في عرق الاكحل في الفخذ وطاح ومات علي المجدع والابل حد يقول فكوها وحد يقول وخذت يوم شافو سبيع المجدع طايح وميت وهم شوي مامعهم احد تشاورو وومرهم
الله واعتصبو وقالو الصبح ماشين على الدواسر وترى المنع مرفوع من مسكتوه اذبحوه يوم اصبحو الى الدواسر ناطحينهم ويجونهم عند (ضبع) ضبع شعيب في الطوقي وتعاطو هم واياهم ويامرهم
الله عليهم واذبحو هم ذبحة ماجرت اللي ذبح من الدواسر تسعين لحيه ويقول الفصام الدوسري كان قصير لسبيع يوم شاف ربعه مذبحين

يامل قلب لاعه اليوم لايع=لوعة ضريب العشب والوبل ماجاه
على بني عمي خيار البضايع=هذي جثاياهم (بضبع)مرماه
داجو عليهم منفدين السرايع=وتعاهدو بالمنع ماحي اطراه
عذروبهم مارد منهم قلايع=راحو على قب من البر مطغاه


وقال ماضي الفطحي من مليح:

جينا نبي العتش نرعى عشبته=نحسب ليالينا من ليالي سعودها
وجانا ابن هادي صايل بجنوده=باطراف نجد والجحادر يذودها
ومن ضد ابن هادي زبنا (معدي)=قصيرنا بايق وثايق عهودها
ياشين (يابن قويد) ماتذكر العهد=كم صفّة من قبلكم بيّح سدودها
ربعي تشادي مزنة يوم امطرت=حمامية قامت تقصف رعودها
رصاصها العبرود والشلف برقها=وملح الثميدي خاثر بارودها
ولكن من ضرب القديمي جضيضهم=جن من الكبريت راحت جهودها
وخلاف ذا ياراكب فوق كوما=طفح الاباهر حاشيات بدودها
تلفي على لابة لي تحدروا=باقصى (حرابه) في شمالي نفودها
زاروهم العجمان هم تندموا=وشيوخهم ذبحت وراحت جرودها
ياما حكم من طامح غب كونهم=والدمع منها غاشيات خدودها

سبيع اللي في حرابه اكانو عليهم العجمان ..كل الكونين في يوم واحد العجمان اكانو على سبيع اللي حدرا والدواسر اكانو على اللي قعدو ماحدرو مع ربعهم

ويقول بن نعيران السبيعي من مليح:

نعم باللي حاضر من جماعتنا=لابتي في يوم الاكوان عيّاله
يوم زارونا الدواسر بديرتنا=فوق (ضبع) مقطع الطلح من جاله
كن مشخول القهر في جريرتنا=مثل نو الصيف لاركّب خياله
احمد اللي رافع عز رايتنا=سعد من ربي عوينه وسوى له
كم هنوف حزنت غب لقوتنا=رجلها من فزعته راح في فاله

وكون ضبع فيه قصيد واجد مانحصيه ويقول ايضا سعد بن عياف الجبري السبيعي ::

غنى المغني في مراقيب العلا=يقعد لزين القاف يبني مثايله
في راس مبرية جذا الطير دونها=صفق الهوا ماناشه الا قلايله
اللي مهيضني نهار اكدر= يوم عبوس ماتعدد قتايله
من عميلنا (ابن قويد) اللي باقنا=وانّا له احلى من حليب شوايله
جانا (معدي) بالدواسر ونزله=يبون وديان من الوسم سايله
فرحنا بهم من ولب حي يضدنا=وباقوا بنا والبوق مامنه طايله
سرنا عليهم لابسين كفاننا=نثاري (بعلي) حل ذبحه بقايله
وقمنا ننسل من عيادين القنا=ومنمش كن الضويه شعايله
لكن صفق الملح مابين جمعنا=جذيب نو مرهقات مخايله
وكن الجنازي في نحايا مداسنا=هشيم تدربى من حدود مسايله
ركضنا مراكيض تزيد عزنا=لا ذل عشّيق البني المايله
حنا بني عمر سلالة عامر=حريبنا دايم نزيد بغلايله
كله لعينا شيخنا زيزومنا=من قبل ماتيبس عليه نثايله
لعينا شيخنا (تسعين لحيه)=دمانهم في صحصح القاع سايله

وهذه القصيدة للشاعر / سيف بن سعد اّل عياف الجبري السبيعي رحمه الله وأسكنه فسيح جناته


عـنـد الضـحـى بــادي فــي راس مبـريـة=رجمـاً طـويـل صـافـي الـريـش مدهـالـي
يــا رجــم عيـنـت لــي ريـــف الـخـلاويـة=عينـت علـي المجـدع مــاض الأفعـالـي
يا ليـت علـي المجـدع شـاف ذا الهيـة=يـشـوف دم اليـمـن فــي الـقـاع سيـالـي
يــشــوف بـالـعـيـن ذبـحـتـنـا الـجـنـوبـيـة=كـــن الجـمـاهـي سـحــال عــنــد دلالــــي
يــا ذيــب يالـلـي تـهـذرب كــل عصـريـة=اطمن من الضلع واركب حد الأسهالي
يــا ذيــب يالـلـي عيـالـك مــا لـهـم نـيـة=يالـلـي عيـالـك شـكـن الـجــوع واهـزالــي
عـان العشـاء لـك مـن فـوق الرماحـيـة=من شـوف يـومٍ علـى الفرجـان يهتالـي
يــــومٍ يــــروع الـيـمــن لا حــــل طــاريـــة=لزمـن تسولـف بـه الشيبـان للأنسـالـي


وقصيدة ابن شليه الجبري السبيعي يقول فيها

جينا من الصمان نبغي ديارنا=نبي ضلعنا نرعى الحيا في حضايبه
جيناك في مثناة (ضبع) واقمنا=نتلفى (لابن قويد) تلفي نبايبه
كانو علينا ماحتسينا لكونهم=ساعة لفانا الشيخ لاالشمس غايبه
صلنا عليهم واصبحوا ناطحيننا=جلبهم الجلاب من اغلى جلايبه
جلبهم الجلاب واستافى الثمن=من قدرة الوالي قبالة نصايبه
ليل على الاجواد لاعاد مثله=القلب كن الضو تصلى لهايبه
يضدوننا العربان لاشافو قلنا=وانّا عليهم ذرحة الموت رايبه
يشوفوننا بالكثر مااناب كثرهم=يدعون غب الكون من هي سبايبه
بعنا عليهم بيعة تبعد العمس=ومن كان بصدره عبرة راح طايبه
وذبحنا في (علي) تسعين لحيه=مامنهم اللي لحيته قيل شايبه
يوم الملاقا والردي كنه اطرم=واليوم يزقح بالحكي من كذايبه
ويحضر عمره لقوة ماحضرها=وتشهد عليه النفس لو كان غايبه
وجانا بن هادي في جموع وجرده=على ( النقا ) مااسب فيهم بعايبه
صيده حمس ولاهوب صلب جدنا=وان عدت الجدان فانا صلايبه


وقال الشاعر الكريم الفارس / حثلان بن سمير المدارية السبيعي رحمه الله وأسكنه فسيح جناته في الشيخ / معدي بن قويد رحمه الله وأسكنه فسيح جناته أنه شاف الحسارات بعد مقتل تسعون رجلا من جماعته الدواسر في معركة ضبع لعيون أخو نوضا الشيخ / علي المجدع بن جفران رحمه الله وأسكنه فسيح جناته :-


(ومعـدي بـن قويـد) شــاف الحـسـارات=مــن ربـعـه الأدنـيـن واحــد وتسـعـيـن
حطوا لهم فـي مقطـع الحـزم منـدات=لعيـون أخـو نوضـا زبــون المخلـيـن
واخذوا على مـا قلـت منـي شهـادات=ومن لا يجيب شهود هاذاك مسكين

هذا بالنسبة لقصائد من عاصروهـا من الشعراء,,,,,,,,,,,,,,,,,

وقال الشاعر / فراج بن محيلب العزة السبيعي :-



ومثل المسمـى (ضبـع) وعلـوم بعـادو=يطـول شــرح السالـفـه بامـتـدادي
ســوالــف غــنــا بــهــا كــــل قــصــاد=وابــن شـلـيـه قـالـهـا لابـــن هـــادي
(((((((لا خـان فينـا خايـن)))))))) يقـشـع الـشـاد=عـلـيـه مـنــا كـســر عـــز وســـوادي
وفي (((شيخنا علي المجدع )))لنا اّكاد=وعيب على اللي ما بقوله وكـادي
اّلاد العزيـزي ميبسـة سـود الأكبـاد=واّلاد جـابــر لا حــــدا كــــل حــــادي
مــــا عــــاد رد الـعــلــم لـلــقــوم رداد=(((تسعين لحيه)))) جو عشـى للحنـادي


وقال الشاعر / دسمـان بن مناحي المحمدي السبيعي وفقه الله وحفظه في قصيدتـه ملحمة سبـيع الغلباء والواقعة في أربعمئة بـيت :-



وفي ضبع يـوم (ن) مـا يـورخ مثيلـه=اخـصـامـنــا راحـــــت عـلـيـهــم دبــيــلــه
قـصــيــد شـاعــرهــم عـلـيـهــم دلـيـلــيــه=جبروا على المحدار من عقب مسناد



ويقصد بقصيدة شاعرهم / الفصّـام الدوسري السابقة والتي يتوجّد فيها على ربعه . هذا والله يحفظكم ويرعاكم مع خالص التحية وأطيب الأمنيات وأنتم سالمون وغانمون والسلام .
ابن جفران غير متواجد حالياً   رد مع اقتباس

مشاركة بواسطة:
قديم 01-26-2011, 02:50 PM   #2
عضو





مفلح الدوسري غير متواجد حالياً

اخر مواضيعي


افتراضي

الاخ ابن جفران السبيعي مرحبا بك وبربعك ومليون نعم بهم

ومثل ماقلت القبائل تغزي وتغزى وكل قبيلة فيها حقها فقبيلة الدواسر لها الكثير من المفاخر والافعال الطيبة

وليس ماذكرة يقلل من شانها ولكن نسال الله الرحمة لهم جميعا وان يغفر لهم

ونرحب بك في منتدى الحريات في قبيلة الدواسر

اخوك مفلح الدوسري
مفلح الدوسري غير متواجد حالياً   رد مع اقتباس

مشاركة بواسطة:
قديم 01-26-2011, 10:55 PM   #3
عضو جديد





ابن جفران غير متواجد حالياً

اخر مواضيعي


افتراضي

الله يحييك ويبقيك ومما لاشك فيه ان الدنيا يوم لك ويوم عليك وموضوعي هذا لايقلل من شأن الدواسر فالدواسر قبيله عريقه نكن لها الكثير من الاحترام وانما لذكر التاريخ لااكثر ولااقل واشكرك اخي مفلح الدوسري على ردك
ابن جفران غير متواجد حالياً   رد مع اقتباس

مشاركة بواسطة:
قديم 01-27-2011, 09:39 AM   #4
عضو جديد





ابن جفران غير متواجد حالياً

اخر مواضيعي


افتراضي

دوسري قطر انت وش دراك عن علوم ربعك اهل الوادي عطنا اخر اخبار بطولة كاس اسيا
واخبارمونديال قطر2022

معركة ضبع شمال أو غرب الرمحية بحوالي 4 كيلو متر قد جرت سنة 1281هـ بين العزة والجبور من قبيلة سبيع بن عامر الغلباء والدواسر ويوجد مقابل ظبع مقطاع الشعيب ( قري )
واسمه (قري / الدواسر) نسبةُ إلى هذه المعركة ولم يقتل من العزه والجبور إلا شخص واحد فقط وكان صديق مقرب جداً من الشيخ / علي المجدع بن جفران وعندما التقى الجمعان سجد لربه وقال : ( اللهم اجعل يومي من يوم / علي قريب ) ولم يقتل غيره قال / الحديثي في كتابه عن سبيع الغلباء وفي هذه السنة جرت معركة بين قبيلة سبيع وقبيلة الدواسر، قتلت فيها تسعين دوسرياً، كما يذكر / لويس بلي ولعل هذه المعركة هي ما يسمى السبيعيون بـ " كون ضبع " وذكر لي أن هذه الواقعة في نهار جمعة، في نفس اليوم الذي وقع فيه " كون ضبع " بين سبيع والدواسر وقعت حرب أخرى بين بقية بني عمر والعجمان انتصرت فيه سبيع الغلباء على العجمان، والذين شاركوا في كون ضبع من السبيعيين : العزة والجبور، أما بقية بني عمر من سبيع فقد صدوا العجمان، وقد قدرت – فيما سبق – أن وقوع كون ضبع كان في سنة 1281هـ بناءاً على ما ذكره الدبلوماسي البريطاني الليفتانت كولونيل / لويس بلي في رحلته إلى الرياض، ذلك التقرير الذي كتبه إلى حكومته بعد أن عادت مقابلة الإمام / فيصل بن تركي..

وبن قويد خان العهد وخاين العهد مالله بناصره

ومن ضد ابن هادي زبنا (معدي)=قصيرنا (((((بايق وثايق عهودها)))))

وهذه الابيات تبين خيانة العهد

من عميلنا (ابن قويد) (((اللي باقنا)))=وانّا له احلى من حليب شوايله
جانا (معدي) بالدواسر ونزله=يبون وديان من الوسم سايله
فرحنا بهم من ولب حي يضدنا=(((((وباقوا بنا والبوق مامنه طايله)))))


المصادر
ايام العرب الاواخر للباحث سعد الصويان
الحديثي في كتابه عن سبيع الغلبا بناءاً على ما ذكره الدبلوماسي البريطاني الليفتانت كولونيل / لويس بلي في رحلته إلى الرياض، ذلك التقرير الذي كتبه إلى حكومته
ابن جفران غير متواجد حالياً   رد مع اقتباس

مشاركة بواسطة:
قديم 01-27-2011, 11:27 AM   #5
"فارس متميز"





سيوف عز غير متواجد حالياً

اخر مواضيعي


افتراضي

اقتباس:
المشاركة الأصلية كتبت بواسطة ابن جفران مشاهدة المشاركة
بناءاً على ما ذكره الدبلوماسي البريطاني الليفتانت كولونيل / لويس بلي في رحلته إلى الرياض، ذلك التقرير الذي كتبه إلى حكومته

ايه

ما دام مصادرك ياخوي يابن جفران

الليفاتنتن لويس بلي

فالغربيين يستقون معلوماتهم من هب ودب وبناءً على من قام بخوتهم او رفقتهم

واستشف من مصادرك انها نقلت للويس من ناس في صدورهم على الدواسر شئ مهوب طيب



اخوي

بعد ذكرك انه قتل 90 من الدواسر مقابل واحد

بديت اشك في ذلك

وقول اخونا انك ورع تكرم ولا يهمك هو ولاغيرة واعتبرها طايشة
__________________


عرض التوقيع
حن بني تغلب من نسل وايــل 000 من قـديـم شـبوب الحرب منا

لا خـذيـــنا السلايـل بالـدبـايــل 000 نعـجـب اللي غطاريفة تــثنـا

نشـتهر بالدواســر من الاوايل 000 ابن كـلثوم وابن كـليـب منـا

غرس ياللي رسى بين المسايل 000 راسي عقب ضرب السيف منا

قد حـــميناه من كـل الـقـبايـل 000 بالـمخابـيط وسيـوف تحـنـا
سيوف عز غير متواجد حالياً   رد مع اقتباس

مشاركة بواسطة:
قديم 01-27-2011, 01:21 PM   #6
عضو جديد





ابن جفران غير متواجد حالياً

اخر مواضيعي


افتراضي

حياك الله اخوي سيوف عز واشكرك على حسن اخلاقك وردك الذي يدل شخصيتك اما راعي قطر رده مردود عليه ولايمثل الا نفسه اما من ناحية مصدر الليفاتنتن لويس بلي اذا على حسب كلامك يستقون
معلوماتهم من هب ودب وبناءً على من قام بخوتهم او رفقتهم فانا اقولك اترك هذا المصدر مع العلم ان كلام الاجانب وموقفهم موقف المحايد لامع هذا ولامع هذا لكن اترك هذا المصدر ولاتأخذ به

وش تقول في المصدر الثاني ايام العرب الاواخر للباحث سعد الصويان؟؟؟؟
ابن جفران غير متواجد حالياً   رد مع اقتباس

مشاركة بواسطة:
قديم 01-27-2011, 02:25 PM   #7
"فارس متميز"





مفلح الدوسري 1 غير متواجد حالياً

اخر مواضيعي


افتراضي

مرحبا ياخي الكريم ابن جفران ونقدر مداخلتك ولكن كان بودنا انك نقلت موضوعك للتوضيح ليس للتفاخر

وقد يكون هناك من رد بنفس الاسم الخاص بي ويوجد فيه اختلاف في الاسماء

القبائل فيها حقها من العلوم الطيبة ولكن نقطة احب توضيحها لك

ان قبيلة الدواسر لايذكر ان كانت تحت امرة ابن قويد فهو زعيم وفارس يغزي ويغزى والمعروف ان اغلي الغزاة يبحثون عن الطمع للعيش فقط وهذا الحال السائد في اصقاع الجزيرة باستثناء من هم يدافعون عن مراعيهم وحدودهم وغالب ما يغزي ابن قويد الى بخاصية قومه وهم ال بالحسن من قبيلة المساعرة وهم ماخذين حقهم وافي من العلوم الطيبة ز

اما قولك ان بن قويد خائن وانه اعطى العهد وخان فهذا مستحيل جدا جدا لان ابن قويد عرف عنه

حفظ العهد وصاحب عهد وبيعه وهذا معروف لدى قبيلة الدواسر وحتى لايكون لاحد علي مدخل باستثناء بعض الاحداث التي خاضها ابن قويد في زمن الامام عبدالله واخيه سعود

لذا ياخي الكريم ابن جفران اتمنى ان لاتاخذ العلم من طرف واحد او تشاهده من زاوية ضيقة

قد يكون كون ضبع صحيح وقد يقتل عدد كثير ولكن الرواة وناقلين الخبر يزودون العدد فهناك الكثير من هذه العينه فمثلا :

قصة لا ندري من ابتكرها ان شخص قحطاني قتل 100 دوسري بسبب ثائر

ومثلا ان ابن قويد وقومة ذبحو من جيش الامام عبدالله الفيصل 1159شخص

وهناك الكثير ولكن هذه الامور لايصدقها عقل رجل فاهم

واما تسعين دوسري قتلو في معركة واحدة فهذا غير منطقي الا في حالة واحدة

الحرب امتدت لفترة طويلة فهذا يجوز ولكن لم نسمع بهذه الحرب وقد يكون فيه تحفظ عليها من قبل اصحاب الشان ز

ولكن قامت معركة كبيرة بين الدواسر وسبيع وذبح الكثير وبلا شك من الطرفين وصارت الغلبة للدواسر
وكانو بقيادة امير الدواسر عامر بن بدران وقد قي القصائدة الكثيرة التي خلدة هذه المعركة

ومنها الشاعرة وسيم العامرية السبيعية عندما رثة اخوانها التسعة والادها السبعة وتذكر انهم قتلو حرب الدواسر وذكرة شخصين من الدواسر الاول عامر ابن بدارن البدارين والثاني ناصر المبعيج الودعاني
وليس يعني ان هؤالا الشخصين من قامو بذبح قومها وربما انهم لم يقتلو احد ايضا

لك التقدير والاحترام وارجو ان لاتخون ابن قويد في سالفتك هذي لانه ليس اهلاً للخيانه كما عرف عنه في سابق العهد
اما دوسري قطر الله يهديه ولو اعطانا اخبار كاس اسيا وعلومها يكون افظل لكونه قريب منهم
شكرا للجميع والله يرحم اموات المسلمين
__________________


عرض التوقيع
أمير الدواسر في عصره عامر ابن بدران رحمة الله والان لم يتجراء احدبخداع الناس وايهامهم بانه امير الدواسر
( من عقب ابن بدران كثرة الامارات )


مفلح الدوسري 1 غير متواجد حالياً   رد مع اقتباس

مشاركة بواسطة:
قديم 01-27-2011, 11:26 PM   #8
عضو جديد





ابن جفران غير متواجد حالياً

اخر مواضيعي


افتراضي

اقتباس:
المشاركة الأصلية كتبت بواسطة مفلح الدوسري 1 مشاهدة المشاركة
مرحبا ياخي الكريم ابن جفران ونقدر مداخلتك ولكن كان بودنا انك نقلت موضوعك للتوضيح ليس للتفاخر

وقد يكون هناك من رد بنفس الاسم الخاص بي ويوجد فيه اختلاف في الاسماء

القبائل فيها حقها من العلوم الطيبة ولكن نقطة احب توضيحها لك

ان قبيلة الدواسر لايذكر ان كانت تحت امرة ابن قويد فهو زعيم وفارس يغزي ويغزى والمعروف ان اغلي الغزاة يبحثون عن الطمع للعيش فقط وهذا الحال السائد في اصقاع الجزيرة باستثناء من هم يدافعون عن مراعيهم وحدودهم وغالب ما يغزي ابن قويد الى بخاصية قومه وهم ال بالحسن من قبيلة المساعرة وهم ماخذين حقهم وافي من العلوم الطيبة ز

اما قولك ان بن قويد خائن وانه اعطى العهد وخان فهذا مستحيل جدا جدا لان ابن قويد عرف عنه

حفظ العهد وصاحب عهد وبيعه وهذا معروف لدى قبيلة الدواسر وحتى لايكون لاحد علي مدخل باستثناء بعض الاحداث التي خاضها ابن قويد في زمن الامام عبدالله واخيه سعود

لذا ياخي الكريم ابن جفران اتمنى ان لاتاخذ العلم من طرف واحد او تشاهده من زاوية ضيقة

قد يكون كون ضبع صحيح وقد يقتل عدد كثير ولكن الرواة وناقلين الخبر يزودون العدد فهناك الكثير من هذه العينه فمثلا :

قصة لا ندري من ابتكرها ان شخص قحطاني قتل 100 دوسري بسبب ثائر

ومثلا ان ابن قويد وقومة ذبحو من جيش الامام عبدالله الفيصل 1159شخص

وهناك الكثير ولكن هذه الامور لايصدقها عقل رجل فاهم

واما تسعين دوسري قتلو في معركة واحدة فهذا غير منطقي الا في حالة واحدة

الحرب امتدت لفترة طويلة فهذا يجوز ولكن لم نسمع بهذه الحرب وقد يكون فيه تحفظ عليها من قبل اصحاب الشان ز

ولكن قامت معركة كبيرة بين الدواسر وسبيع وذبح الكثير وبلا شك من الطرفين وصارت الغلبة للدواسر
وكانو بقيادة امير الدواسر عامر بن بدران وقد قي القصائدة الكثيرة التي خلدة هذه المعركة

ومنها الشاعرة وسيم العامرية السبيعية عندما رثة اخوانها التسعة والادها السبعة وتذكر انهم قتلو حرب الدواسر وذكرة شخصين من الدواسر الاول عامر ابن بدارن البدارين والثاني ناصر المبعيج الودعاني
وليس يعني ان هؤالا الشخصين من قامو بذبح قومها وربما انهم لم يقتلو احد ايضا

لك التقدير والاحترام وارجو ان لاتخون ابن قويد في سالفتك هذي لانه ليس اهلاً للخيانه كما عرف عنه في سابق العهد
اما دوسري قطر الله يهديه ولو اعطانا اخبار كاس اسيا وعلومها يكون افظل لكونه قريب منهم
شكرا للجميع والله يرحم اموات المسلمين
الله يحييك وانا مانقلت الموضوع للتفاخر وانما للتوضيح وحتى لو اني اتفاخر يحق الفخر كما يحق لك ولقبيلتك الفخر بافعالها واما من ناحية ابن قويد وقيادته للدواسر انا لم اقل انه كان يقود الدواسر كافه بل كان معه خبرة قليلة من ربعه والا الدواسر معروفين وفي ديارهم والدليل على ذلك قول الشاعر سيف بن سعد ال عياف الجبري

يــا ذيــب يالـلـي عيـالـك مــا لـهـم نـيـة=يالـلـي عيـالـك شـكـن الـجــوع واهـزالــي
عـان العشـاء لـك مـن فـوق الرماحـيـة=من شـوف يـومٍ علـى (((الفرجـان))) يهتالـي

وهنا يقصد الشاعر الفرجان من الدواسر لان اكثر اللي معه ذاك اليوم الفرجان ويمكن اكثر من ربعه القريب واما قولي ان بن قويد خاين فالقصيد اللي يقوله ولست انا من يقوله وسالفة قحطان مع الدواسر لم يذكر فيها من القصيد شي وسالفة 1159شخص اول مره اسمعها ولااكذبها وفي نفس الوقت لااصدقها وكون ضبع يشهد له الكثير من القصائد

لعينا شيخنا (تسعين لحيه)=دمانهم في صحصح القاع سايله

ويقول الاخر

وذبحنا في (علي) تسعين لحيه=مامنهم اللي لحيته قيل شايبه

.................................
مــــا عــــاد رد الـعــلــم لـلــقــوم رداد=(((تسعين لحيه)))) جو عشـى للحنـادي



واما قصة عامر بن بدران والمبيعيج فهذه القصه مشهوره عند سبيع وعند الدواسر وعند قبائل نجد كافه
وماهي الا اخذ الثار من سبيع حين قتلو من الدواسر الكثير والدواسر اخذو ثأرهم وشكرا لك اخي مفلح الدوسري
ابن جفران غير متواجد حالياً   رد مع اقتباس

مشاركة بواسطة:
قديم 01-29-2011, 01:52 AM   #9
عضو جديد





ابن عمر غير متواجد حالياً

اخر مواضيعي
 


افتراضي

بزران تجمعو وكلن يرطق من عنده وحنا وحنا وفعلنا وتركنا ، والله العظيم مراهقين ماقدرتو النعمه الي انتم فيها امن وامان من أصبح منكم آمناً في سربه ، معافى في جسده ، عنده قوت يومه ، فكأنما حيزت له الدنيا بحذافيرها ) وش الطاري وش المناسبه وش الهدف مثل هذه القصص تزيد النعرات والبغضاء .... اقول ربنا لا تؤاخذنا بما فعل السفهاء منا .... وانا لا ابرئ نفسي من التقصير
ابن عمر غير متواجد حالياً   رد مع اقتباس

مشاركة بواسطة:
قديم 01-29-2011, 12:18 PM   #10
عضو جديد





ابن جفران غير متواجد حالياً

اخر مواضيعي


افتراضي

شكرا لك اخي ابن عمر على النصائح ووفقنا الله واياك لما يحب ويرضى
ابن جفران غير متواجد حالياً   رد مع اقتباس

رد


أدوات الموضوع إبحث في الموضوع
طرق مشاهدة الموضوع

تعليمات المشاركة
لا تستطيع كتابة مواضيع
لا تستطيع كتابة ردود
لا تستطيع إرفاق ملفات
لا تستطيع تعديل مشاركاتك

كود [IMG] متاحة
كود HTML معطلة
الانتقال السريع إلى


الإعــلآنــآت النصيــة


الساعة الآن: 11:13 AM


Powered by vBulletin . Copyright ©2000 - 2014

Security by AOLO
الاتصال بنا تصميم المنافع لتقنية المعلومات
الأرشيف تصميم المنافع لتقنية المعلومات